إعادة تدوير:مزيل مناكير!

لكل سؤال إجابة: كيف أفتح اثار حب الشباب؟/الحروق؟/المناطق الغامقة؟

السلام عليكم

اكثر سؤال يجيني في الاسك هو كيف اتخلص من اثار الحبوب او اثار الحروق,وكيف افتح المناطق الغامقة فحبيت اني اسوي هالبوست واقول لكم فيه اكثر من طريقة للتخلص من التصبغات على البشرة

ليش تتصبغ بشرتنا؟
فيه اسباب كثيرة للتصبغات , بس اهمها تضرر البشرة من الجروح او حب الشباب او الحروق,وعدم الاهتمام وتراكم الجلد الميت وهذا سبب المناطق الغامقة عند بعض الاشخاص وممكن يكون لاسباب ثانية راح اتكلم عنها 

ايش هي انواع التصبغات اللي راح تتكلمين عنها ؟

انا ما راح اتكلم عن كل انواع التصبغات بس راح اذكر 3 انواع سهل انك تعالجينهم بنفسك اما الانواع الباقية الاكثر حساسية وعمق فيستحسن انكم تعالجونها عند طبيب الجلديةمثل اثار الحروق العميقة والنمش وتصبغات التقدم في العمر والحمل

1- اثار حب الشباب والجروح:

 وطبعا يختلف حسب عمقه فيه ناس ممكن يكون عندهم زي التصبغ ولون اغمق من لون الشرة وفيه ناس زي اللي في الصورة يكون زي الحفر 

وهالاثار هي احد مراحل اعادة تكوين البشرة وهي في النهاية بتروح بس تحتاج وقت طويل جدا بالذات اذا كانت عميقة ومسويه تضاريس بالبشرة

2-اثار الحروق السطحية 

واقصد به آثار الحروق من الدرجة الأولى بعد شفاءها تماما اما بسبب الشمس او التحرض لحرارة عالية او التعرض لمادة كيميائية كاوية وسبب بقاء الاثر نفس حب الشباب هو احد مراحل اعادة تكوين البشرة لكن ياخذ وقت طويل 

اما اثار الحروق من الدرجة الثانية والثالثة فبعد علاجها وشفاءها تماما يفضل مناقشة موضوع الاثار والندوب مع طبيب الجلدية لان الاثار قد تكون عميقةوتاخذ وقت اكبر في التخلص منها  وتحتاج لعناية اكبر واكثر احترافية من قبل شخص متخصص .


3- المناطق الغامقة في البشرة:

ولها عدة اسباب واهمها عدم الاهتمام وتراكم الجلد الميت

وممكن استخدام الشفرة أو الموس وكريمات ازالة الشعراذا المنطقة فيها شعر والحل تريحين المنطقة تستخدمين طريقة ثانية للشيل

السمنة وترهل الجلد وفي العادة يكون بسب ان المطقة مكتومه اما بالجلد واحتكاكه او بالملابس او الشعر..الخ

فرط التصبغ وممكن تكون حالة وراثية وتعالج عند الطبيب

العطر والمستحضرات المعطرة, مثل مزيل العرق المعطر والكريمات المعطرة ممكن تسبب المناطق الغامقة خاصة اذا حطيتي المستحضر وكتمتي النطقة على طول

طيب , الحين صار وقت اشرح كيف راح نفتح هالاثار والتصبغات . 

1- العلاج:

اول خطوة واهم خطوة اننا نعالج مسبب التصبغ يعني نعالج حب الشباب او فرط التصبغ او السلوك اللي يسب هذا التصبغ عشان اذا عالجنا الاثار ماترجع مرة ثانية

2- التقشير :

بشرتنا تجدد نفسها بشكل مستمر وخفيف جدا وممكن مايكون ملحوظ , ولو تركنا هذي الاثار من ست شهور لسنه (اذا كانت سطحية جدددا) راح نلاحظ انها تفتحت , بس راح تاخذ سنوات حتى تختفي تماما , عشان كذا اذا ساعدنا بشرتنا وقشرناها من مرة الى مرتين في الاسبوع راح نلاحظ الفرق بشكل اسرع , 

بس للتقشير انواع كثيرة راح اقسمها قسمين عشان نختصر

أ- تقشير سطحي: مثل التقشير اللي نسويه في البيت وعند المشاغل وكذا او بعض انواع التقشير عند طبيب الجلدية مثل التقشير الكريستالي 

ب- التقشير العميق: مثل التقشير الكيميائي العميق او التقشير بالليزر

ماا انصح في التقشير عند الطبيب إلا في  حالة ان مسبب الاثار وقف يعني اذا حب شباب يكون خلاص ماصار يطلع حب شباب او فرط تصبغ تكونون خلاص عالجتوه 100% لانكم اذا قشرتوا عند طبيب الجلدية الاثار راح ترجع مرة ثانية لأن المسبب لازال نشط, وماراح تستفيدون الا نتائج مؤقته الا اذا كان هذا اللي تبغونه .

طيب انا راح اتكلم عن التقشير السطحي اللي نقدر بكل سهولة نسويه في البيت 

أ- الفرك

ممكن تفركين المنطقة بفرشة الوجه او الجسم او ليفة الجسم وفي بعد ليفة للوجه او مقشر مخصص للجسم او للوجه وممكن تسوينه بنفسك مجرد تحطين سكر خشن مع عسل وتفركين المنطقة مرتين في الاسبوع عشان ماتتعب البشرة و بتلقين مقشرات وليف وفرش التقشير  في الصيدلية او ذابودي شوب

او ممكن تستخدمين فرشة الوجه او الجسم كل يوم مع غسولك او الصابون اللي تفضلينه
وفيه مقشرات مخصصة للاستعمال اليومي مثل كلين اند كلير وغيره


ب-الأحماض

الأحماض الطبيعية موجودة في اغلب الفواكه مثل التفاح والكيوي واي فاكهة في طعمها حموضة ولو بسيطة وحتى في الاشياء اللي مدري وش هي مثل الليمون والطماطم XD

وطبعا الاحماض موجودة بشكل كبير في الليمون بما انه يعتبر من الحمضيات ممكن انك تحطين عصير الليمون مع البيكنج باودر وتحطينهم على وجهك بس اهم شي ان ماعندك جروح جديدة او حبوب ماراحت لانه راح يعورك  << تعلمت بالطريقة الصعبة XD
وممكن تجيبين شريحة ليمونة او اي فاكهة ثانية وتفركينها بوجهك وماتغسلين وجهك إلا لما ينشف العصير عليه وممكن تغطين الشريحة بسكر من الجهة اللي رح تفركين فيها وبكذا تكونين جمعتي بين الفرك وتعريض البشرة للاحماض

وممكن تجي الاحماض على شكل كريمات تنباع في الصيدلية مثل

Benzoyl Peroxide

Salicylic Acid

Topical Retinoids
المعروف باسم رتن اي

ولها اسامي تجارية كثير والصيدلي رح يعطيك الموجود عنده والحمض يكون مخفف جدا في الكريم او الجل عشان مايتعب البشرة واهم شي تختبرين الكريم ضد الحساسية في منطقة صغيرة من الجلد وراح تلقين كل التعليمات مع الكريم ولاتنسين تتبعينها بدقة

وهذي الأحماض اللي اغلب اطباء الجلدية راح يوصفونها لك اذا عندك احد هالمشاكل ف اذا كنتي قد رحتي من قبل تأكدي من الكريمات اللي عندك عشان ماتروحين تشترين نفس الكريم مرة ثانية باسم تجاري مختلف


3- التبييض

بعد ماقشرنا صار وقت التبييض , فيه كثير كريمات في السوق بس مو كلها فعالة
خط التبييض من لوريال اللي باللون الأبيض والأزرق اثبت فعاليته , بس يمكن تبغين تستخدمين نوع طبي اكثر ؟

Hydroquinone
الهيدروكينون هي المادة الفعالة في اكثر مستحضرات التبييض وممكن تسألين الصيدلي عن كريم يحتوي هالمادة ونصيحتي لاتاخذين نوع تركيزة اكثر من 2% او استشيري الطبيب اذا بتاخذين اكثر
وللكريم هذا نتايج عكسيه عند التعرض للشمس فتأكدي انك تحطين واقي للشمس


فيتامين "أ" و "ج"
يمكن الفيتامينات آمنه اكثر , وهالفيتامينين يساعدون في التبييض اذا كانوا في كريم او مستحضر ينحط ع البشرة مباشرة


وممكن تطلبين من الصيدلي كريم تبييض واكيد راح يعطيك نوع طبي جيد


4-التغذية والترطيب

مع التقشير والترطيب لازم نحافظ على البشرة رطبة ومتغذية حتى ماتصير حساسة مع الوقت 

البشرة تحتاج فيتامينات مثل أ,هـ,ج 

وتحتاج دهون وزيوت مثل زيت اللوز وزبدة الشيا وزبدة الكاكاو 

فتأكدوا ان الكريم المرطب اللي تستخدمونه يحتوي على فيتامينات وزيوت او مستخلصات 

ولاتنسون لترين موية في اليوم 

5- الحماية

لاتنسون تحمون بشرتكم من الشمس لأن الشمس ممكن تخلي الاثار اسوأ 

استخدموا واقي شمس على الأقل 30 

او غطوا المنطقة حتى ماتتعرض للشمس بشكل مباشر 

6- الصبر

بشرتنا تتكون من طبقات كثييرة فوق بعض , فلاتتوقعون النتايج تبان من اليوم الثاني 

حتى تتخلصون من الاثار او الندوب تماما تحتاجون على الأقل 3 شهور واحيانا اكثر 

فدخلوا هذي الخطوات في روتينكم اليومي حتى ماتطفشون وتنسونها 

في النهاية :

إذا وصلتي لهالفقرة ,, احب اشكرك على زيارتك لمدونتي 3>

تويتر: https://twitter.com/Noralovesmakeup 
آسكـ: http://ask.fm/Noralovesmakeup

بوليفور: http://noralovesmakeup.polyvore.com 
قناتي في اليوتيوب :
http://www.youtube.com/channel/UCTCNX50TgwQUwj8w-Fd7uyg?feature=mhee

ايميلي:Noralovesmakeup@gmail.com 

أسدلت جدائلها خجلاً ..}~تسريحات جدايل

My Twitter: https://twitter.com/Noralovesmakeup
Ask me :http://ask.fm/Noralovesmakeup
My Polyvore :http://noralovesmakeup.polyvore.com

اختاري الروج الانسب للون بشرتك

السلام عليكم 

وحدة من متابعاتي ع التويتر سألتني من فترة عن درجات ارواج تناسب بشرتها فعشان كذا قررت اكتب عن هذا الشي 

اعرف كثير ناس مايعترفون إلا بدرجة روج وحدة او ثنتين ومقررين ان مافي ي روج يناسبهم بالحياة الا هالدرجة او الدرجتين 

وهذا شي خطأ مية بالمية 

اول شي تقدرين تحطين اي درجة روج انتي حابتها في الحياة بس اهم شي كيف تحطينها ! 

اول شي خلوني اتكلم عن الأندرتون

الاندر تون هو اللون المخفي لأي لون في الحياة وهو اللي يعطي اللون حيويته 

انا متأكدة ان انكم تشوفون الفرق بين الروجين الأول والثاني واختلاف اللون مايتعلق بدرجته فاتح وغامق

كله احمر بس الأول فيه نسبة ازرق اكثر من الثاني وهذا اللي مخليه طافي شوي ,اما الثاني ففيه نسبة اصفر اكثر وهذا اللي مخليه على برتقالي

نفس الشي في بشرتنا اندرتون بارد ودافي وطبيعي بعد

اذا تبغين تعرفين الادرتون تبعك شوفي العروق في معصمك اذا كانت زرقا مثل الصورة معناه ان الاندرتون عندك بارد واذا كان لونها اخضر معناه الاندرتون تبعك دافي واذا كان عندك اللونين معناه ان الاندرتون تبعك طبيعي 

"الاندرتون مايعتمد على اذا البشرة فاتحة او غامقه وهو موجود في كل الوان البشرة بتدرجاتها من افتح بشره لأغمق بشرة"

طيب وش نستفيد من الاندرتون ؟؟

الاندرتون راح يساعدنا في اختيار لون الروج المناسب!

مثل ماتشوفون في اول صورتين فوق البنت الاولى بشرتها على وردي وهذا الشي معناه ان اندرتونها بارد وروجها برضو اندرتونه بارد ونفس الشي ينطبق على الصورة الثانية الروج دافي وبشرتها دافية 

طيب ليش اندرتون الروج نفس اندرتون البشرة ؟

طبعا هذا شي يعتمد عليكم وعلى ذوقكم والمكياج ماله قواعد, هو فن يعكس شخصيتك ,بس اذا حطيتي روج اندرتونه دافي على بشرة بارده راح يصير صارخ نوعا ما وجاذب للنظر بحيث اللي يكلمك راح يناظر روجك ماراح يناظر عيونك وهذا شي يعتمد على رغبتك

وممكن يصير فيه تباين واضح ويصير الروج شاطح 

واذا صار العكس يعني روج اندرتونه بارد على بشره اندرتونها دافي ممكن يصير الروج اصلا شاحب لونه ويصير فيه تباين بين الروج والاندر تون يعني يبين وجهك على اصفر اكثر والروج بيكون على رمادي ويعتمد على نسبة الازرق والاصفر كل ماصار الروج على ازرق وبشرتك على اصفر يبين اكثر

بالنسبة للبنات اللي اندرتونهم زيتوني او طبيعي  يعني عندهم عروق خضرا وزرقا بنفس الوقت , هذولي يمكن اسهل عليهم لان اكثر الارواج بتناسبهم بس اذا كان روج مايل على اندرتون معين بشكل كبير يمكن مايطلع حلو 

وبرضو فيه ارواج اندرتونها في الوسط يعني مو دافية او باردة او تكون دافية او باردة بس يغلب عليها الاعتدال وهذي الارواج بتناسب ناس كثير وراح اتكلم عن هذي الارواج بالنهاية ان شاء الله 

 في كثير ناس مايعرفون اذا يناسبهم الروج الغامق او الفاتح 

في كل الحالتين اذا كان الروج فاتح مرة او غامق مرره ممكن يبين شكلك تعبانه او شاحبه

عشان كذا خليك في حدود لون شفايفك الطبيعي خذي افتح منه او اغمق منه بدرجتين او ثلاث درجات واكثر من كذا يمكن تكون مخاطرة =)

برضو ما انصحك بالارواج الغامقة اذا كانت شفايفك صغيرة وتبغينها تبين اكبر واذا كانت شفايفك كبيرة مرره وماتحتاجينها تكون اكبر فخليك على درجة شفايفك الطبيعية او اغمق

بالنسبة للأرواج اللي ماتناسبك لسبب او لأخر فالحل بسيط , اما انك تحطين هالروج فوق روج ثاني بحيث تنخلط الالوان ويطلع لون جديد , وجربي بأكثر من روج حتى تلقين لون يعجبك ويناسبك 

او , طريقة ممكن تكون عمليه اكثر , اشتري قلوس او روج بنفس لون الاندرتون تبعك يعني اذا كان اندرتونك دافي خذي اورنج او اصفر واذا بارد خذي بنفسجي او ازرق واذا كنتي زيتوني خذي بيج او لحمي وحطيهم مع الارواج اللي تحسين مايناسبونك وها الشي بيهدي لون الروج وبيخليه يناسبك  لانك زدتي عليه لون اندرتونك وهذا الشي بيخليه مثل اندرتونك او باندرتون معتدل 

الحين راح اعرض بعض منتجات الشفايف اللي ممكن تناسب اللي اندرتونهم بارد

هذا الروج السائل كلور ستاي من ريفلون اسمه Miracle Mauve 030

وهذا برضو كلور ستاي من ريفلون اسمه Brilliant Bordeaux 040 

وهذا لروج من ريفلون كمان اسمه fabulous fig 009

بالنسبة للأندرتون الدافي

ريفلون كولور ستاي Perfect Peony 001

ريفلون  750 Kiss Me Coral

ريفلون  #654 Ravish Me Red

وهذا يناسب كثير وهو من الارواج القليلة اللي كثيير من البنات اتفقوا انه يناسب كثير من الناس

وهو روج Viva Glam V من ماك 

اللون وردي على لحمي طبيعي جدا ومناسب لكل مناسبة ولكل وقت ومكان مرا جميل وغير مبالغ فيه 

في النهاية :
إذا وصلتي لهالفقرة ,, احب اشكرك على زيارتك لمدونتي 3>

My Twitter: https://twitter.com/Noralovesmakeup
Ask me: http://ask.fm/Noralovesmakeup

My Polyvore: http://noralovesmakeup.polyvore.com

My YouTube Channel :
http://www.youtube.com/channel/UCTCNX50TgwQUwj8w-Fd7uyg?feature=mhee